Суббота 17 марта 2018 / 4 марта 2018

4-я седмица Великого поста. Глас седьмый.
Великий пост. Пища с растительным маслом

Суббота Родительская. Поминовение усопших . Прп. Герасима, иже на Иордане (475). Прп. Герасима Вологодского (1178). Блгв. кн. Даниила Московского (1303). Сщмч. Александра пресвитера (1938). Блгв. кн. Василия (Василько) Ростовского (1238). Мчч. псковских, латинами умученных: прп. Иоасафа Снетногорского, Псковского (1299) и прмч. Василия Мирожского, Псковского (1299). Мчч. Павла и Иулиании, сестры его и иже с ними: Квадрата, Акакия и Стратоника (ок. 273). Прп. Иакова постника (VI). Перенесение мощей блгв. кн. Вячеслава Чешского (938). Свт. Григория, еп. Констанции Кипрской.

Чтения дня

Евреям 6:9-12
Марка 7:31-37
1 Коринфянам 15:47-57 (за упокой)
Иоанна 5:24-30 (за упокой)

Тропари

Прп. Герасима, иже на Иордане. Кондак, глас 4.
Возгоре́вся раче́нием Го́рним,/ же́стость пусты́ни Иорда́новы па́че всех ми́ра сла́дких предпоче́л еси́;/ отону́дуже повину́ся тебе́ зверь да́же до сме́рти, о́тче,/ послу́шне и жа́лостне на гро́бе твое́м сконча́ся,/ просла́вльшу тя та́ко Бо́гу,/ к Нему́же моля́ся, и о нас,/ о́тче Гера́симе, помина́й.

Блгв. кн. Даниила Московского. На благословении хлебов тропарь, глас 4.
Княже́ния твоего́ сла́ву отложи́в,/ озаря́емый Боже́ственною благода́тию,/ Богому́дре кня́же Дании́ле,/ весь ра́зум в се́рдце от су́етнаго ми́ра сего́/ к Зижди́телю неукло́нно возложи́л еси́/ и, я́ко звезда́ на восто́це Росси́йскаго госуда́рства просия́л еси́,/ целому́дрием же и равноа́нгельным твои́м житие́м/ тече́ние до́бре соверша́я,/ ве́ру соблю́л еси́ непоро́чну,/ тем и по сме́рти просла́ви тя Бог в чудесе́х,/ я́ко источа́еши исцеле́ния ве́рно притека́ющим к честне́й ра́це твое́й;/ сего́ ра́ди днесь пра́зднуем успе́ние твое́, лю́дие твои́./ Ты же, я́ко и́маши дерзнове́ние ко Христу́,/ моли́ спасти́ оте́чество твое́/ и ми́рней бы́ти держа́ве на́шей.

Ин тропарь на обретение мощей, глас 3.
Яви́лся еси́ в стране́ на́шей,/ я́ко звезда́ пресве́тлая,/ благове́рный кня́же Дании́ле,/ луча́ми све́та твоего́ озаря́я град твой и оби́тель твою́,/ правосла́вным побо́рник еси́,/ пле́нным свободи́тель и ни́щим защи́титель,/ моли́ Христа́ Бо́га/ держа́ве Росси́йстей дарова́ти мир/ и спасти́ ду́ши на́ша.

Кондак, глас 4.
Избра́нный Бо́гом от чресл роди́тельских/ и воспи́танный от от младе́нчества в зако́не Госпо́дни в му́жа соверше́нна/ и Про́мыслом Вы́шняго, имени́таго гра́да Москвы́ насле́дие кня́жества прие́м,/ ве́рен строи́тель благочести́вым лю́дем твои́м показа́лся еси́, Богоблаже́нне Дании́ле,/ и́хже о́бразом свои́м наставля́я/ и поуча́я за́поведем Госпо́дним вы́ну,/ путе́м, веду́щим в живо́т ве́чный, при́сно ше́ствуя,/ Небе́снаго Ца́рства дости́гл еси́,/ иде́же со а́нгельскими водворя́яся ли́ки, пое́ши Бо́гу: Аллилу́йя.

Ина служба Блгв. кн. Даниила Московского.
Тропарь, глас 5.

Благодатноро́дный сын Твой,/ Всетвори́телю Го́споди Бо́же наш,/ щедрототво́рством христоподража́тельный отец Дании́л/ в ева́нгельском запове́дании и благоразу́мном свое́м житии́/ чудесодарова́ния и Небе́сная со святы́ми пребыва́ния восприя́т/ от Тебе́, Спаси́теля на́шего Христа́ Иису́са./ Возыме́в бо Твое́ Боже́ственное посо́бие,/ суетномирски́я и плотоо́гненныя стра́сти упраздни́/ и враги́ де́моны, неви́димыя и ви́димыя злотво́рцы/ и разори́тели своего́ великокня́жескаго насле́дия, победи́./ Того́ моли́твами спаси́ вся,/ зову́щия Тебе́: Аллилу́йя.

Тропарь, глас 5.
Благосла́вная похвало́ и благосве́тлый ве́нче/ ца́рствующаго гра́да Москвы́,/ всеблаже́нне Дании́ле, о́тче наш./ По́двигом бо до́брым подвиза́вся,/ богоуго́дное тече́ние соверши́л еси́,/ всера́достныя неконча́емыя жи́зни сподо́блься,/ зри́ши Го́спода Бо́га,/ Ему́же моли́ся,/ благочеству́ющим тя и лобыза́ющим богохрани́мыя твоя́ и чудесото́чныя мо́щи/ спасе́ние и насле́дие Ца́рства Небе́снаго дарова́ти.

Кондак, глас 8.
Я́ко Богонасажде́нное и Богоразу́мное дре́во в Росси́и возра́сл еси́/ и многопло́дием Богоподо́бных доброде́телей твои́х утучня́еши сердца́ благочести́вых./ Те́мже в кре́пости по́мощи твоея́, преблаже́нне Дании́ле,/ от вся́ких нас бед свободи́,/ да пое́м при́сно: Аллилу́ия.

Прп. Герасима Вологодского. Тропарь, глас 4.
Я́ко Безпло́тным единонра́вен/ и преподо́бным соо́бщник, преподо́бне Гера́симе,/ еди́н на Во́логду прише́л еси́,/ прорица́я ту бы́ти гра́ду вели́кому/ и в нем святе́й це́ркви воздви́гнутися/ и святи́телем водвори́тися./ Те́мже и сподо́бился еси́/ близ того́ погребе́н бы́ти/ и по преставле́нии свое́м мно́гими чудесы́ исцеле́ний просия́л еси́./ Моли́ся всегда́ о нас,/ я́ко да обря́щем от Бо́га ми́лость.

Кондак, глас 8.
От ю́ности, прему́дре, мирски́й мяте́ж оста́вил еси́,/ и многоце́нныя ри́зы тле́нныя возненави́дел еси́,/ и святу́ю оде́жду а́нгельскую любе́зно восприя́л еси́,/ и ту соблю́л еси́ в чи́стой со́вести/ и во благи́х де́лех, и до преставле́ния своего́/ бысть Боже́ственнаго ра́ди жития́ Тро́ицы селе́ние/ и просвети́л еси́ ве́рою приходя́щия к тебе́;/ те́мже вси зове́м ти:/ ра́дуйся, о́тче Гера́симе всечестны́й.

Перенесение мощей блгв. кн. Вячеслава Чешского. Тропарь, глас 4.
Днесь Áнгели с челове́ки ра́дуются вку́пе о́бщим весе́лием,/ Не́бо и земля́ све́тло лику́ют в па́мять твою́, свя́те./ И мы, гре́шнии, приле́жно ти вопие́м:/ помоли́ся к Влады́це о нас,/ изба́вити ны от напа́сти/ ви́димых и неви́димых враг,/ чту́щих пресве́тлую па́мять твою́.

Другий тропарь, глас 1.
Благочести́ваго ко́рене отра́сль пречестна́я,/ святы́й благове́рный вели́кий кня́же Вячесла́ве,/ побо́рник быв Восто́чныя в Че́хах Це́ркве/ и прибе́жище те́плое убо́гим и си́рым,/ я́ко вторы́й Áвель, незло́биве претерпе́л еси́ смерть,/ во главу́ усече́н руко́ю бра́та пред враты́ церко́вными./ Те́мже и всели́ тя Христо́с/ я́ко испове́дника пра́выя ве́ры во оби́тели Небе́сныя,/ просла́ви всечестну́ю па́мять твою́ в слове́нских язы́цех/ и дарова́ тя ско́раго помо́щника всем, почита́ющим тя./ Моли́ся о лю́дех твои́х ко Го́споду,/ да обрати́т их в ло́но Правосла́вныя Це́ркве и спасе́т ду́ши на́ша.

Кондак, глас 1.
С ли́ки Áнгельскими предстоя́,/ блаже́нне кня́же Вячесла́ве,/ наслажда́ешися Боже́ственныя и неизрече́нныя добро́ты/ и, отту́ду благоде́тельныя да́ры поче́рп чуде́с,/ всем, притека́ющим ве́рою под твою́ святы́ню,/ источа́еши цельба́м дарова́ние.